QUINTA REUNIÓN CLUB DE LECTURA LARPACONTOS ESO. CURSO 2024-2025

 O mércores 18 decembro 2024 realizamos a última reunión do Club de Lectura Larpacontos ESO deste ano 2024, moi contentos pola posibilidade da incorporación de dous novos membros no club, alumnos/as de 3º e 4º ESO. Medra así o club e teremos a posibilidade de enriquecer con diversidade, sumando ideas, proxectos, soños. O profesor de Lingua Galega, Diego Cousiñas, que forma parte do club de lectura, animou aos membros/as a participar en diferentes concursos literarios, xa que ademais da lectura, varias das persoas que forman parte do club teñen dotes creadores. Falamos tamén da posiblidade de instaurar o tempo de lecer dos mércores que non temos reunións do club de lectura como unha actividade paralela na que igualmente podemos utilizar a biblioteca escolar para realizar diferentes obradoiros ou xuntanzas, alternando actividades variadas. Falamos tamén dos avances das nosas lecturas, sobre todo daqueles que seguen a ler ou xa remataron o libro de O Xabaril Branco, de Tucho Calvo, e falamos da posibilidade de que este autor viñera ao noso centro a falar da súa obra. Outro punto do día foi decidir a vindeira lectura a realizar, e por votación saiu a saga  Sword Art Online, do nipón Reki Kawahara. Pensando da proximidade das vacacións realizamos por último o empréstito de as novas lecturas Soy de pueblo: manual para sobrevivir en la ciudad, de Moderna de Pueblo; y El cuerpo de Cristo, de Bea Lema. Seguro que xa nas nosas casas e con máis tempo libre poderemos avanzar e disfrutar das nosas lecturas. Felices Festas e vémonos no 2025!!

OBRADOIRO DECORACIÓN NADAL

Alumnado do Club de Lectura Larpacontos. Mércores 11 decembro 2024. Aproveitamos as nosas reunións alternativas do Clube de Lectura (os mércores que non temos reunión "oficial" do clube de lectura") para potenciar a nosa creatividade e gozar construíndo manualmente elementos de nadal que decorarán o bonito espazo da Biblioteca Castelao. Agradecemos a axuda da nosa profesora de galego, Rocío Prego, que foi quen organizou esta iniciativa de "obradoiro de decoración de nadal".

ESCRITURA CREATIVA E ILUSTRACIÓN

Aínda que as reunións "oficiais" do Club de Lectura Larpacontos ESO realízanse os mércores cada quince días, os rapaces/zas que forman parte do club decidiron reunirse igualmente os outros dous mércores do mes que quedan libre para utilizar este tempo de lecer para actividades relacionadas co club de lectura. Por unha banda temos a un grupo de rapazas que están facendo bocetos e ilustracións para utilizar na decoración dun armario que temos para os libros adquiridos polo Club de Lectura, e tamén para publicar na revista escolar que estase a elaborar en 1º da ESO. E por outra banda temos a dúas rapazas que adican este tempo á escritura creativa, redactando (tanto de maneira manual con bolígrafo e papel como de maneira dixital cun procesador de textos) diferentes historias que posiblemente vexan a luz nesa revista escolar Teen Side que sairá a final de curso. Parabéns a estas persoas por desenvolver estas actividades tan enriquecedoras. A escritura creativa e a ilustración, integradas na educación, potencian a imaxinación, a expresión escrita e oral, e o pensamento crítico dos estudantes. A combinación de ambas as disciplinas permite aos alumnos conectar coa aprendizaxe dunha forma máis lúdica e significativa, fomentando a creación de historias e a exploración de diferentes formas de expresión 

CUARTA REUNIÓN CLUB DE LECTURA LARPACONTOS ESO. CURSO 2024-2025

A cuarta reunión do Club de Lectura Larpacontos da ESO levouse a cabo o mércores 4 de decembro 2024, nesta ocasión contando coa incorporación dunha nova docente (sendo agora catro os/as profesores/as que se animan a participar nesta iniciativa). Foi unha reunión moi aninada e dinámica, centrada principalmente no libro O Xabaril Branco (do autor Tucho Calvo coas ilustracións de Miguelanxo Prado), obra que está tendo éxito entre os lectores e que ademais serve para iniciarse na lectura en galego a algunha das alumnas que procede do estranxeiro. Os/as que xa están a ler este libro deron algunhas pinceladas (iso si, sen facer spoiler), sobre as aventuras de Tucho, un rapaz que inicia unha viaxe desde os Ancares ata Arxentina, onde coñecerá a muller da súa vida e presenciará a dureza da conquista das terras dos indios araucanos. Moi interesantes foron os comentarios de Diego Cousillas Novo, o profesor de lingua galega, que comparou este libro cos grandes clásicos da literatura (Jack London coa natureza máis salvaxe dos paraxes de Norteamérica ou  Melville coa busca do leviatán).

E pensando xa na escolla das seguintes lecturas a efectuar no mes de decembro, os/as participantes do club votaron a súa preferencia en relación aos libros Moderna de Pueblo e Orgullo y Perjuicio, e tamén presentáronse as sagas de manga  Sword art Online y Los 7 Pecados Capitales,  para ir investigando e facer unha elección á volta das vacacións de Nadal. Na rolda de recomendacións saíron títulos como O que nunca che contaron, La tumba de las luciérnagas, Cuentos en verso para niños perversos, Cuánta Tierras necesita un Hombre, Una vida sin salud mental, entre outros. Paula Cadaveira, a profesora de CCSS, presentou o comic Tintín en el Congo, unha lectura recomentada para o alumnado de 4º ESO que está a abordar o colonialismo, comentando a polémica da reedición desta obra de Hergé. Cuerpo de Cristo, de Bea Lema, foi outro dos libros que se abordaron nesta reunión, xa que é unha obra que se están a ler os profesores/as integrantes do Club de Lectura e que chamou moito a atención tamén dos rapaces e rapazas, non so pola súa estética, senón pola temática. 

A reunión foi tamén un espazo para promover entre o alumnado iniciativas vinculadas coa lectura e os libros, como é o concurso de recitado Concurso Rosalía Sempre Viva.

TERCEIRA REUNIÓN CLUB DE LECTURA LARPACONTOS ESO

Ademais das notificacións para as reunións que enviamos a través da aula virtual, o Clube de Lectura Larpacontos ESO está a editar uns marcapáxinas (editados en canva e plastificados) para repartir uns días antes da reunión e así ningúen se esqueza á cita. Nesta ocasión, como sabemos que varias rapazas son amantes dos gatiños, fixemos un recordatorio cuns simpáticos michiños. Iniciamos a reunión do clube realizada o mércores 20 de novembro de 2024 falando dos libros da autoría de dous membros do clube de lectura. Trátase de varias rapazas de 1º da ESO, que se uniron ao clube no presente curso, e ademais da lectura son unhas apaixoadas da escritura. Falaron das súas creacións: desce cando escriben, que temáticas abordan nas súas historias, quen son os seus escritores/ras referentes. Tamén temos unha compañeira que está interesada na ilustración. Desde o clube de lectura imos animar a estas persoas a que avancen na súa obra literaria e artística, ofrecéndolle a posibilidade vir á biblioteca os mércores que non teñamos reunión do clube para poder utilizar os ordenadores con programas de procesador de texto para proseguir na escritura, ou tamén avanzar nos experimentos de ilustración. O resto da rapazada que se anime a vir estes mércores, poderá proceder a restaurar e decorar un fermoso armario con rodas que serve para colocar os libros mercados polo clube de lectura. 

En canto ás lecturas comentadas, a obra Los Miserables, de Victor Hugo, centrou gran parte da conversa. O Clube de Lectura Larpacontos ESO xa tiña mercados varios exemplares en dous versións: por un lado a versión comic de Norma Editorial e por outra banda unha adaptación de Federico Villalobos publicada por Ediciones Mensajero. A mediadora do club de lectura, que imparte clases de música na ESO, solicitou que a biblioteca mercase o DVD da versión cinematográfica, e a estamos vendo a película dirixida por Tom Hooper co alumnado que cursa a optativa de música en 4º da ESO, xa que parte do alumnado pertence ao club de lectura. Tamén aproveitamos para comentar as aventuras de o Xabaril Branco, escrita por Tucho Calvo, un dos libros cos que iniciamos a actividad lectora neste curso 2024-2025. 

SEGUNDA REUNIÓN CLUB LECTURA LARPACONTOS ESO. CURSO ACADÉMICO 2024-2025

Mércores 6 de novembro de 2024. O libro Los Miserables de Victor Hugo foi o elemento que guiou esta segunda reunión do Club de Lectura Larpacontos ESO. Foi a proposta máis votada entre os tres libros que se recomendaron para dar inicio á nosa actividade de lectura neste novo curso escolar. Dispoñemos do libro en formato manga e en formato novela reducida, xa que o orixinal de Victor Hugo ten unha gran extensión e complexidade para a idade dos nosos lectores/as. Deuse un interesante intercambio de opinións coa intervención de todos os/as participantes, expoñendo o seu punto de vista, e desde logo, o que podemos afirmar é que a lectura deste grande clásico da literatura universal está tendo unha moi boa acollida entre os lectores/as. Deu tempo tamén nesta segunda reunión de ir facendo propostas para as vindeiras lecturas, partindo sempre desde os gustos persoais, pero tendo sempre en conta de que os libros elixidos sexan axeitados para as idades dos membros do club e que teñan un poso positivo e enriquecedor a nivel humano e educativo. 

PARABÉNS AOS LECTORES/AS NO DÍA DAS BIBLIOTECAS

Polo Día das Bibliotecas que se celebra o 24 de outubro, a Biblioteca Castelao homenaxeou aos lectores entregándolles uns agasallos aos rapaces e rapazas de EP e da ESO que máis libros levaron no curso 23/24. Parabéns! Especial mención para aqueles rapaces/zas que sodes membros do Club de Lectura Larpacontos da ESO, que estades entre os máis lectores do cole. 

Queremos dar a noraboa ás persoas que forman parte dos Clubes de Lectura do centro escolar, xa que é evidente que estas iniciativas potencian a motivación e o asentamento do hábito de ler. Exemplifican este feito os lectores homenaxeados na etapa da ESO, todos eles membros do Club de Lectura Larpacontos ESO, deste xeito convertíndose en referentes para os seus compañeiros e invertindo as estatísticas: está comprobado que na adolescencia os mozos mostran unha menor propensión á lectura en comparación coas mozas, cun maior déficit en hábitos de lectura, debido diversos factores(falta de interese polos temas de lectura, influencia da contorna familiar e social, falta de modelos, etc). Grazas a estes rapaces (Iván, Elías e Marcos) tal vez outros adolescentes se animen visitar máis a biblioteca e gozar das múltiples e variadas lecturas dispoñibles!

1º REUNIÓN CLUB LECTURA LARPACONTOS ESO. CURSO 2024-2025

O pasado mércores 9 de outubro de 2024 un grupiño de alumnos/as da ESO, acompañados por un par de docentes, reuníronse na biblioteca escolar para dar inicio ao Club de Lectura Larpacontos. Nesta primeira xuntanza tivemos a oportunidade de facer presentacións, sobre todo das novas persoas que se incorporan ao club, e tamén compartir cales son as nosas expectativas. Tivemos tempo de falar de posibles temáticas para ir elixindo a primeira das nosas lecturas. O que poidemos comprobar é que ademais do gusto pola lectura, varios/as dos/as integrantes tamén adican o seu tempo de ocio á escritura é ao debuxo, polo tanto esperamos que tamén podamos sacar partido a estos talentos e potenciar a súa creatividade e formación a través de obradoiros que podan ir xurdindo ao longo do curso. conforma 

A nosa idea é reunirnos quincenalmente os mércores na hora de lecer que hai despois do xantar (de 14:45 a 15:35). 

DIPLOMA LARPACONTOS

Quixemos facer un recoñecemento  ao  compromiso dos integrantes do Club de Lectura Larpacontos nun acto público que tivo lugar o último día de clase, o mércores 21 de xuño de 2024, a través da entrega dun un diploma acreditativo. Todo o alumnado e profesorado implicado nos tres clubes de lectura que se levaron a cabo no noso centro neste curso 2023-2024 (2º EP, 5º EP e ESO) levará para casa un diploma que recoñeza a súa participación e compromiso. Este acto de entrega se realizou na Biblioteca Castelao, coa presencia do coordinador da biblioteca e parte do equipo de bibliotecas e alumnado de varios cursos, que tamén presenciaron no mesmo acto a entrega de diplomas acreditativos da participación no programa Voluntariado na Biblio ou o lanzanzamento da revista Teen Side nº 2.

ROTEIRO LITERARIO E MONUMENTAL POLA VILA DE BETANZOS

E chegou o momento tan esperado: unha xornada compartida cos Clubes de Lectura do IES Eusebio da Garda (A Coruña) desfrutando de todo o que nos ofrece unha vila tan próxima, a de Betanzos. O programa foi variado, xa que quixemos aproveitar a ocasión para visitar diferentes espazos e proxectos. Como eramos moitos entre profesores/as e alumnos/as, dividímonos en dous grupos dunhas 30 persoas aproximadamente. Mentres no primeiro grupo se facía un roteiro literario e monumental pola vila betanceira, da man de Elena Carro, técnica de turismo do Concello de Betanzos, o outro grupo visitou a libraría Biblos e o Centro Internacional da Estampa Contemporánea. Carmela González Boo, responsable desta libraría betanceira, ofreceu unha interesante charla á mocidade describindo como é todo o proceso desde que un autor escribe unha obra ata que chega ás librarías, e agradeceu o interese deste público mozo na súa participación en iniciativas de fomento da lectura, como son os Clubes de Lectura. A rapazada tivo tempo de deleitarse mirando e comentando variados e atractivos exemplares, e algúns/has aproveitaron para facer algunha compra. Acto seguido fixemos parada no CIEC (Centro Internacional da Estampa Contemporánea), ubicado nun emblemático edificio modernista, e María Pena, unha das encargadas desta institución, ofreceu unha visita guiada moi didáctica, explicando as diferentes técnicas de gravado e presentando os diferentes espazos. 

Ao mediodía tivemos un xantar conxunto no Parque Pasatempos, e aproveitamos para facer un pequeno acto simbólico de irmandamento entre os dous centros escolares e un intercambio de regalos. Foi unha xornada moi enriquecedora e esperamos poder realizar máis actividades cos Clubes de Lectura do IES Eusebio da Garda. 

https://librosabertos.blogspot.com/2024/06/excursion-betanzos-co-club-do-cpi-virxe.html

DÉCIMO SEGUNDA REUNIÓN CLUB DE LECTURA

O venres 24 de maio 2024 o alumnado realizouse a décimo-segunda reunión do Club de Lectura da ESO. A piques de rematar o curso esta reunión quedouse moi curta, xa que ademais de falar de libros e lectura, estivemos a perfilar varias actividades que temos entre mans. Unha delas é unha actividade en colaboración cos Clubes de Lectura do IES Eusebio da Garda, de A Coruña. Está programada para o vindeiro luns 10 de xuño de 2024, e consistiría nun roteiro literario e monumental por Betanzos, para ver diferentes localizacións que saen nalgunha das nosas lecturas, visitar unha libraría e un museo. Previamente a este encontro físico cos rapaces e rapazas do instituto coruñés, estamos a elaborar uns paneis de presentación, para poder enviarllos por correo electrónico e xerar unha especie de intercambio epistolar en formato dixital. 

En canto ás lecturas, somos conscientes de que nestas alturas do curso, aveniñándose o fin de curso e múltiples exames e traballos, imos ter que deixar un pouco de lado as lecturas voluntarias, non obstante igualmente seguiremos respectando os nosos ritmos personais de lectura, e ademais de falar do que vivimos e sentimos a través das lecturas, estamos tamén pensando e facer suxerencias para ir fornecendo a biblioteca escolar con libros acordes aos nosos gustos e preferencias. Este curso temos que dicir que, coincidendo coa temática marcada pola Asesoría de Bibliotecas Escolares de Galicia, o comic, banda deseñada e novela ilustrada foron os auténticos protagonistas, especialmente o manga/anime. 

SELO E ESPAZO LARPACONTOS

 Os logotipos crean unha imaxe asociada a un producto e son indicador de identidade. Por iso o Club de Lectura Larpacontos acaba de adquirir un selo co seu nome e logotipo, e deste xeito poder identificar todos os fondos bibliográficos que foron adquiridos a través das partidas económicas asociadas ao programa de Club de Lectura das Bibliotecas Escolares de Galicia. Unha das ideas que temos pensado levar a cabo é facer unha búsqueda de todos os libros mercados cos fondos do Club de Lectura para poñerlles o selo e tamén crear un pequeno recuncho onde situar as adquisicións. 

LECTURAS COMPARTIDAS

 

O mércores 15 de maio de 2024 dimos inicio ás lecturas compartidas das lexendarias lendas do recreo, escritas por El Hematocríticas, e reunidas nun único tomo: Legendario. Axudados e guiados por alumnos do Club de Lectura da ESO, os nenos e nenas de 2º EP pasarán os recreos dos mércores achegándose a esta divertida pandilla de comic!

XVI XORNADA DE CLUBS DE LECTURA

 

A responsable do Club de Lectura Larpacontos asistiu á XVI Xornada de Clubs de lectura (martes 14 de maio de 2024 - Edificio Fontán. Cidade da Cultura. Santiago de Compostela). Esta xornada constitúe unha reunión anual do profesorado que coordina os clubs de lectura dos centros que participan no programa de CLUBS DE LECTURA, da Consellería de Educación, Ciencia, Universidades e Formación Profesional. 

CONCURSO "MI LIBRO PREFERIDO 2024"

"Mi libro preferido" é un certame de fomento á lectura para o alumnado de 1º a 4º da ESO matriculado en centros educativos galegos. O prazo remata o 31 de maio de 2024. Pódese participar en dúas modalidades: texto escrito e podcast.

Guia Lectura Mi Libro Prefe... by veracruces

Guia Podcast en Tres Pasos by veracruces

DÉCIMO PRIMEIRA REUNIÓN CLUB DE LECTURA

Xa iniciando a conta atrás para o remate deste curso, os membros do Club de Lectura Larpacontos da ESO reúnense o venres 3 maio 2024. Falamos da reciende experiencia da asistencia ao musical do Rei León en Narón (o pasado martes 30 de abril), e decidimos convertir as entradas en orixinais marcapáxinas, para que cada vez que esteamos facendo as nosas lecturas nos lembremos das vivencias desa xornada tan especial. Outro punto de interés a abordar nesta reunión consistiu en definir como imos elaborar una presentación do noso Club de Lectura para enviar ao alumnado dos Clubes de Lectura do IES Eusebio da Garda, e así irnos coñecendo previamente antes da xornada conxunta que está prevista para realizar o vindeiro luns 10 de xuño en Betanzos. Aínda que estamos a finais de curso e cada vez temos máis traballos, exames e outras responsabilidades que se van xuntando, trataremos de sacar algo de tempo para ler a novela O Segredo de Al'Eume, da escritora Pilar Ortega Pereiro, unha das lecturas que están tamén a realizar os nosos compañeiros/as do instituto coruñés, e que poden dar pé a un traballo conxunto. 

LARPACONTOS ESO VAI AO MUSICAL

 Musical O Rei León, Narón, martes 30 abril 2024

Achégase o final de curso e o Club de Lecturas Larpacontos da ESO quere premiar a constancia e o compromiso dos cinco rapaces/zas da ESO que o conforman facéndolles entrega de algo moi especial: unha experiencia que lembrarán toda a súa vida: a posibilidade de asistir a o musical tributo a O Rei León, no Pazo da Cultura de Narón (martes 30 abril 2024). O Rei León é unha desas películas que pasaron á historia atraendo a curiosidade de milleiros de espectadores en todo o mundo, e que despois de 20 anos do seu estreno no cine, segue cautivando ao público grazas a producións musicais con voces en directo, atractivas coreografías e unha grande posta en escea. Ademais de todos estes compoñentes sensoriais destacamos a grande importancia das mensaxes: a amizade verdadeira, a aprendizaxe e aexperiencia na vida, ou o respecto, entre outras. 

DÉCIMA REUNIÓN DO CLUB DE LECTURA

 Venres 19 abril 2024.

NOVENA REUNIÓN DO CLUB DE LECTURA LARPACONTOS

 Xa de volta das vacacións de Semana Santa realizamos o venres 5 abril 2024 a que vén sendo a nosa novena reunión do Club de Lectura Larpacontos. Ademais de charlar sobre as lecturas realizadas no período vacacional, nesta reunión abordáronse puntos moi importantes agora que da comezo a terceira e última avaliación. Por unha banda estamos a organizar unha saída extraescolar para o alumnado integrante do Club de Lectura que constitúa unha experiencia cultural enriquecedora e signifique tamén un premio ou obsequio polo seu compromiso levado a cabo durante todo este curso. Tamén fixemos un recordatorio da importancia de ir elaborando un guión radiofónico para poder no mes de xuño gravar un programa de radio na emisora CUAC FM de A Coruña. Plantexamos a posibilidade de restaurar unha antiga vitrina do centro para poder albergar todos os fondos e adquisicións realizadas polo Club de Lectura durante este curso 2023-2024 para que estén expostos nun recuncho da Biblioteca Castelao e poder realizar a deste curso ou principios do próximo curso unha campaña de achegamento á lectura para captar a incorporación de novos membros/as para o Club. E moi interesante a proposta dos membros varóns do Club de Lectura, que teñen prevismo realizar unha especie de "Biblio-Patio-Manga", isto é, un carrito con rodas para poder sacar ao exterior nos tempos de lecer, e así promocionar a lectura deste xénero que lles apaixoa e facilitar a lectura do mesmo ao resto do alumnado interesado nos tempos de lecer sen necesidade de facer rexistros ni empréstitos. Desde logo que ideas e ilusión non nos falta!!

OITAVA REUNIÓN CLUB DE LECTURA

Venres 22 marzo 2024

CONTACONTOS PARA O ALUMNADO DE EDUCACIÓN PRIMARIA

 Elías Espiñeira, alumno de 2º da ESO e membro do Club de Lectura Larpacontos,  realiza a lectura para alumnado de 2º EP. Mércores 20 de marzo de 2024

Inés e a cadela sabia. Cabana, Darío Xohán. Editorial: Rodeira.