TERCEIRA REUNIÓN CLUB DE LECTURA

A terceira reunión deste curso académico 2023-2024, e última do primeiro trimestre, tivo lugar o venres 15 de decembro de 2023. Ademais de falar e comentar lecturas anteriores tivemos a oportunidade de revisar as últimas adquisicións para o Club de Lectura. Como cada un de nós ten o seu propio ritmo de lectura, estamos a realizar algunhas lecturas paralelas. Nestos momentos, tendo en conta os nosos gustos e preferencias, seguimos centrados no mundo do cómic e da banda deseñada, e sen deixar de lado o formato "manga" coas súas temáticas específicas, queremos achegarnos á literatura máis universal con grandes clásicos como A Ilíada e a Odisea de Homero, ou grandes novelas como Los Miserables de Víctor Hugo, para ir tamén comparando as diferentes versións. 

FORMACIÓN EN RADIO E VISITA A UNHA LIBRARÍA CORUÑESA

A xornada especial do mércores 29 de novembro de 2023 ofreceu aos membros do Club de Lectura Larpacontos unha ocasión extraordinaria para descubrir novas posibilidades.  Grazas á iniciativa e ao apoio da Fundación Ayuda en Acción e acompañados dos membros do Club de Radio do CPI Virxe da Cela, poidemos visitar as instalacións de Radio CUAC FM, situadas na zona da Zapateira (A Coruña). Nesta emisora de radio recibimos unha fantástica visita guiada e formación teórica, que nos deu moitas ideas para poder empregar a radio no Club de Lectura como unha ferramenta para falar das nosas lecturas, expresar as nosas opinións, facer recomendacións lectoras, etc. Xa en horario de tarde visitamos unha librería no centro da cidade herculina e cada un/unha dos/as integrantes do Club de Lectura fixo unha elección dun libro, xa que todos somos diversos/as e temos gustos e inquedanzas particulares. Este lotiño de libros foron mercados a cargo do Club de Lectura e qservirá para as nosas próximas lecturas. 

E despois de tantas horas de convivencia rematamos a xornada con moitos elementos positivos: a convivencia entre ambos clubes foi moi agradable e positiva, e incluso algún novo membro pasará a integrar o Club de Lectura Larpacontos. Esperamos tamén facer colaboracións durante este curso 2023-2024 e poder regresar de novo ás instalacións de Radio CUAC FM no mes de maio ou xuño para gravar en directo un especial radiofónico sobre a lectura. 

Esta experiencia empezou cuns cantos alumnos/as subíndose a un microbús. Aí o pasamos moi ben falando e xogando. Ao chegar ao campus universitario de A Coruña, lugar onde está situada a sede de CUAC FM, recibíronnos moi ben e ensináronnos todo: os aparatos, as ferramentas, etc. A visita durou un par de horas, e ao final nos fixeron unha presentación con todo e uns datos máis concretos, e responderon ás nosas dúbidas. Despois fumos ao centro de A Coruña e deixáronnos tempo para comer onde quixeramos. Uns amigos e mais eu fumos ao K.F.C. Despois de xantar fumos a unha libraría, a FNAC, na que os participantes do Club de Lectura elixiron un libro cada un/unha para a biblioteca do noso centro educativo. Chegamos de volta xusto para coller o bus para ir para casa.  Marcu (1º ESO)

SEGUNDA REUNIÓN CLUB LECTURA LARPACONTOS CURSO 2023-2024

O venres 24 de novembro de 2023 levouse a cabo a segunda reunión do Club de Lectura Larpacontos no curos 2023-2024. O tempo de reunión non chegou a nada, xa que ademais de comentar primeiro libro seleccionado para ler, Jojo´s Bizarre Adventure do autor xaponés Hirohiko Araki, planificamos diferentes aspectos da saída que se vai facer o vindeiro mércores 29 de novembro á emisora da radio CUAC na Coruña e posterior visita a unha librería coruñesa. Tamén propusimos as novas lecturas: La Odisea de Horero e Los Miserables de Victor Hugo, ambas obras en formato comic/novela gráfica.

PRIMEIRA REUNIÓN CLUB LECTURA LARPACONTOS 2023-2024

 O venres 18 de outubro realizamos a primeira reunión do Club de Lectura Larpacontos ESO, coa incorporación de dous novos membros e moitas ganas proseguir coa actividade desenvolvida no curso anterior. Mergullámonos no mundo da banda deseñada coa primeira lectura elixida: Jojo´s Bizarre Adventure.

ABRINDO AS PORTAS A UN NOVO CURSO NO CLUB DE LECTURA LARPACONTOS

 

ESTABLECENDO FUTURAS COLABORACIÓNS CO CLUB DE LECTURA DO CEIP ARDÁN (MARÍN)

O noso centro, o CPI Virxe da Cela, está a participar no programa Observa-Acción, da Xunta de Galicia. Nesta II Fase do programa, denominada "Acolle", tivemos a oportunidade de visitar o CEIP de Ardán (Marín) e de exercer de anfitrións deste centro que veu a visitar a nosa escola. Foron moitos os froitos deste intercambio de experiencias entre ambos centros, e durante un proceso de reflexión conxunta, xurdiron diferentes puntos para establecer futuras colaboracións, entre elas, vinculando os clubes de lectura.

CLAUSURA CLUB DE LECTURA: ENTREGA DE DIPLOMAS E AGASALLOS

Aproveitamos o último día lectivo para ofrecer un sentido agradecemento ás persoas que se comprometeron a formar parte deste Club de Lectura neste curso 2022-2023. Sen vós non sería posible levar a cabo esta iniciativa. Os levades debaixo do brazo un colorido diploma, unha fermosa bolsa para portar libros realizada artesanalmente e un par de libros, un pequeno agasallo para compensarvos polo esforzo por remar cara a mesma dirección, a pesares de que non sempre a lectura, a cultura e a educación é "trending topic" e que hai que remar a contra corrente. E xa non como regalo, senón como empréstito, tamén marchades para casa cun par de libros para aproveitar as vacacións estival. Feliz verán e lembrade... a lectura é sempre unha viaxe. 

LECTURAS PARA O VERÁN

 Chegan as ben merecidas vacacións de verán. Rematamos o curso escolar, agora poderemos deixar dun lado as obrigas académicas e aproveitar ben o tempo de lecer. Veñen os longos días de verán para ir a praia, durmir longas sestas, e por que non, invertir o noso valioso tempo en algo que tanto nos apaixoa, a lectura. Por iso, desde o Club de Lectura Larpacontos queremos facer entrega aos seus membros de novas lecturas para as longas tardes de estío. 

RUTA LITERARIA CON XESÚS FRAGA

O prometido é débeda, e que mellor idea que rematar o curso escolar e clausurar a nosa actividade co Clube de Lectura Larpacontos que vivindo unha experiencia diferente fora das aulas: unha ruta literaria por Betanzos da man do escritor Xesús Fraga. A través da mirada e lembranzas deste betanceiro nacido en Londres descubrimos non o Betanzos monumental dos condes e burgueses, senón un Betanzos máis humilde e non menos importante, ese pobo no que fai varias décadas Virtudes, avoa do escritor e protagonista da novela Virtudes (e misterios), Premio Nacional de Narrativa 2021, percorría para gañarse o pan e sacar adiante a súa familia antes de atopar na emigración o único remedio para saír da pobreza. Ese Betanzos que grazas á labor filantrópica dos Irmáns García Naveira puido ofrecer equipamentos públicos e institucións asistenciais a aqueles cidadáns que  como Virtudes vivían nunha situación precaria, así como o acceso á educación e á cultura: lavadoiro público municipal, escolas, residencia de anciáns, parque enciclopédico, etc. 

Esta viaxe a través das rúas de Betanzos serviu tamén para analizar a transformación non so dos espazos, senón dos costumes e maneiras de vida, e transmitir a unha nova xeración, os rapaces/zas do CPI Virxe da Cela de Monfero, información sobre os xogos da infancia, os bailes da mocidade, os oficios e saberes populares, isto é, o patrimonio inmaterial. Contribuiu tamén para isto o relato xa non do autor, senón da súa nai Isabel e as súas tías Elena e Leonor, protagonistas da novela, que participaron activamente na animada charla-coloquio realizada na libraría Biblos tras a ruta literaria. 

XORNADA COMPARTIDA CO CLUBES DE LECTURA DO IES EUSEBIO DA GARDA

O Mosteiro de Monfero foi un espazo ideal para coñecer aos alumnos/as e profesores/as dos Clubes de Lectura do IES Eusebio da Garda. Grazas á nosa profesora de CCSS, Paula Cadaveira, que o ano pasado impartía clases neste centro coruñés, os 3 alumnos/as e a coordinadora do Club de Lectura Larpacontos do CPI Virxe da Cela poidemos establecer novos contactos e sentar as raíces para futuras colaboracións. Ademais de gozar dos diferentes espazos exteriores e interiores desta fermosa peza do noso patrimonio, o Mosteiro de Monfero serviu como escenario para o recitado de poemas do Cancionero de Monfero de Álvarez Blázquez, unha pequena representación teatral, así como as explicacións sobre este monumento e o contexto histórico da súa construción. 

Se queredes ler unha crónica máis detallada da actividade, premede a seguinte imaxe:

XORNADAS DE CLUBES DE LECTURA

A coordinadora do Club de Lectura Larpacontos do CPI Virxe da Cela asistiu ás Xornadas de Clubes de Lecturas realizadas en Santiago de Compostela o pasado luns 5 xuño 2023, en horario de 10:00 a 20:00 horas. Inaugúranse as xornadas coa entrega do Premio dos Clubs de Lectura 2023 ao escritor Manuel Núñez Singala, que ofreceu unha charla baixo o título "Teatro, lingua e humor". Acto seguido Felipe Munita falou sobre a mediación e a formación de lectores. Finalízase a mañá coa asistencia a mesas de experiencias simultáneas con temática variada, como "A banda deseñada nos clubs de lectura" ou  "A interactividade nos clubs de lectura". Xa en horario de tarde Carlos Martínez Uzal e Julio Abalde García explican o proxecto "Biblioterapia", prosiguen as mesas de experiencia simultáneas "Literatura e Natureza de Thoreau",  "Os audiovisuais nos clubs de lectura" e "O teatro nos clubs de lectura". O broche final corre a cargo da poeta Olga Novo Presa que nos fai reflexionar coa súa charla "A lectura do infinito".

Estas xornadas serviron tanto na vertente de formación para os coordinadores dos Clubes de Lectura, así como para o establecemento de colaboracións e futuras liñas de traballo conxunto. 

ESTABLECENDO COLABORACIÓNS CON OUTROS CLUBS DE LECTURA

 O sábado 3 de xuño de 2023 a coordinadora do Club de Lectura Larpacontos participou nunha xornada literaria celebrada en Betanzos e organizada por varios clubs de lectura da zona. Consistiu nunha ruta literaria guiada polo escritor Xesús Fraga visitando os lugares da súa novela Virtudes (e Misterios), comezando no Lavadoiro Municipal, e rematando cunha charla-coloquio nun espazo con moito encanto, o cine Alfonsetti de Betanzos. Tamén participou e enriqueceu a ruta o bibliotecario e archivero municipal de Betanzos, Ángel Arcay Barral, aportando curiosa información histórica dos espazos visitados, así como da vida e obra dos Irmáns García Naveira, benefactores de Betanzos e responsables da construción de diferentes edificios visitados. 

10ª REUNIÓN CLUB DE LECTURA

Hoxe, venres 26 de maio 2023, celebramos a nosa décima e última reunión oficial do Club de Lectura ESO Larpacontos. Ademais de falar das últimas lecturas realizamos a valoración da experiencia de participación no Club de Lectura, e anticipándonos aos resultados do formulario de avaliación que cubriremos próximamente, temos todos/as moi claro que para o vindeiro curso... repetiremos!! Encantounos a experiencia. Pero isto non remata aquí neste curso... Durante o mes de xuño reunirémonos de maneira puntual cando atopemos o momento idóneo para preparar a nosa actividade final: o roteiro literario por Betanzos e a charla coloquio co escritor brigantino Xesús Fraga, autor da novela Virtudes (e Misterios), ambientada nesta vila das mariñas coruñesas.

9ª REUNIÓN CLUB DE LECTURA

 O venres 12 de maio de 2023 realizamos unha nova reunión no Club de Lectura Larpacontos. É final de curso, temos moitos exames e traballos, polo tanto menos tempo para ler, e diso deixamos constanza na reunión. Non obstante proseguimos, cada un ao noso ritmo, nas lecturas anteriores, vencelladas a Betanzos. Mais agora dámoslle unha volta á tortilla, e querendo tamén coñecer outras realidades, plantexamos como nova lectura La flor perdida del chamán de K. Un increíble viaje de los Andes a la Amazonia, de Davide Morosinotto, unha emocionante novela ambientada en Perú. Así tamén poderemos achegarnos ao país de orixe da nosa compañeira Karem, e por tanto facer o intercambio cultural máis equilibrado.

8ª REUNIÓN DO CLUB DE LECTURAS

 E xa achegándonos ao fin de curso e con intención de preparar unha ruta literaria por Betanzos, na runión do Club de Lectura Larpacontos efectuada o venres 28 abril 2023 imos a presentar dous novelas ambientadas nesta localidade tan próxima ao noso centro: Interna en una casa de muñecas de Carmen Cutrín Porral  e Virtudes (e misterios) de Xesús Fraga.

7ª REUNIÓN CLUB DE LECTURA

Realizarmos unha nova reunión do Club de Lectura Larpacontos o  Venres 14 de abril 2023, e con esta xa van sete. Proseguimos coa intención de facilitarlle a Karem máis títulos en lingua galega, por iso eliximos O corazón de Xúpiter, de Ledicia Costas. Nesta novela, protagonizada por unha adolescente, afondaremos tamén noutros temas moi importantes, como é o acoso escolar ou o risco das novas tecnoloxías e as redes sociais. Esta lectura seguro que nos da moito xogo para abrir debate.