DECIMOPRIMEIRA REUNIÓN CLUB LECTURA LARPACONTOS ESO. CURSO 2024-2025

 Mércores 9 abril 2025. O tempo de reunión do Club de Lectura Larpacontos non nos chega a nada! Tratamos de comentar as lecturas e do que estas nos provocan, facer recomendacións, informar de axenda relacionada coa lectura e cos concurso literarios, relacionarnos, convivir, e cando nos damos conta o timbre está a sonar chamándonos de novo ás aulas... Ler gústanos, e falar das lecturas sábenos a pouco! Sobre todo cando se trata de falar de obras tan fermosas como o de Mapas Literarios do autor Huw Lewis-Jones, que contén de imaxes de gran beleza, incluíndo bosquexos inéditos dos autores, figuran mapas do mundo tal como víase na Idade Media, outros de clásicos da literatura e de historias moi apreciadas, e mapas de aventuras, ciencia ficción e fantasía...

CLUBES DIXITAIS DE LECTURA

Queremos difundir unha información que nos chegou desde o departamento de Igualdade da Deputación da Coruña. Trátase de dúas novas iniciativas que estamos promovendo en colaboración coa Biblioteca Provincial da Coruña, o Club de Lecturas de Igualdade "Tinta e Equidade" e o Club de Lecturas de Diversidade Sexual "Páxinas de orgullo". Dous espazos para explorar, aprender e compartir a través da literatura.

"Tinta e equidade" é un club dixital de lecturas en igualdade de xénero que ten o obxectivo específico de promover entre a poboación un pensamento crítico sobre as desigualdades de xénero e crear un espazo de encontro para fomentar o diálogo e a reflexión sobre a igualdade a través de libros e historias. Un lugar para compartir ideas, aprender e inspirar cambios positivos na sociedade que lanzarase a partir do 7 de abril de 2025. Está moderado por Maitane Vicente Mariño, Traballadora social e libreira social. 

"Páxinas de orgullo" é un club dixital especializado en lecturas LGTBiQ+ co obxectivo de visibilizar a importancia da tolerancia e a igualdade das persoas, independentemente da súa orientación sexual e identidade de xénero, e co propósito de normalizar e sensibilizar á sociedade sobre as diversidades sexuais. Este club estará activo a mediados do mes de abril.  Está moderado por Nuria Vilán, Grao en estudos de Galego e Español. 

Pertencer aos clubs dixitais "Tinta e equidade" ou "Páxinas de Orgullo" non ten ningún custo, está dirixido a persoas de mais de 14 anos, incorpora medidas de accesibilidade para persoas con discapacidade e está aberto a que podades usalo as 24 horas do día os 365 días do ano.

Instrucións para poder formar parte destes clubs de lectura dixital:

1. Faite socio/a da túa biblioteca municipal.

2. Date de alta na eBiblioDaCoruna: enche o formulario que atoparás aquí e agarda a que che enviemos unha mensaxe ao teu correo electrónico cunha ligazón, a través da cal podes establecer o teu contrasinal.

3. Entra na eBiblioDaCoruna aquí e identifícate co teu usuario (que é o teu correo electrónico) e o contrasinal. Tamén podes descargar a app dispoñible para Android, iOS e Huawei.

4. No menú da eBiblioDaCoruna (tanto na versión web como na app) atoparás o acceso a "Club de lectura e espazo de aprendizaxe". Preme nel.

5. Elixe o club no que queres entrar de entre os dispoñibles e preme en "Comeza a experiencia". A partir dese momento xa podes participar no club, ler o libro, comentar, compartir citas, etc.

Para máis información e inscricións, non dubidedes en visitar a páxina web da Biblioteca Provincial da Coruña. 

DÉCIMA REUNIÓN CLUBE LECTURA LARPACONTOS ESO

 Mércores 26 marzo 2025

NOVENA REUNIÓN CLUB LECTURA CLUB LECTURA LARPACONTOS ESO

Mércores 12 marzo 2024. Aproximándose a data de celebración do Día das Letras Galegas 2025, este ano adicada ás cantareiras, parte da reunión a utilizamos para comentar algún dos libros relacionados con esta temática que adquiriu o Club de Lectura Larpacontos neste curso.  Promovemos a lectura e escoita do libro+cd Fuliada na Vila (Richi Casás, A Central Folque) aproveitando a visita do autor ao noso centro. Animamos ao alumnado a mergullarse na historia da tradición oral e as cantareiras a través da atractiva proposta  Sei cantar e sei bailar, de (Eva Mejuto, Edicións Xerais), a disposición na biblioteca escolar e facilitando a simultaneidade na lectura ao mercar o clube de lectura varios exemplares.

Por outra banda realizamos unha escolla de libros tendo en conta as recomendacións que van facendo os/as membros do Club de Lectura, tendo en conta os seus gustos e preferencias. E xa que estamos a falar de música, animádesvos a ler La melodía de la magia, de Violeta G.?

OITAVA REUNIÓN LARPACONTOS ESO. CURSO 2024-2025

Unha nova reunión do Club de Lecturas Larpacontos ESO levouse a cabo o mércores 19 febreiro de 2025, xuntándonos profesorado e alumnado para compartir as nosas inquedanzas sobre a lectura. 

Abrimos a reunión facendo reconto de votos con respecto ás recomendacións lectoras deste mes, e así poder ir elexindo as novas adquisicións. Dimos paso a un pequeno espazo de debate a raíz da lectura do libro Historia de Sara, escrito por Francisco Castro e ilustrado por Luz Veloso, xa que trata un tema moi complexo e incluso tabú. Todos e todas estivemos dacordo en que gustounos moito a lectura do libro, a pesares da dureza do tema tratado, e consideramos que a publicación deste libro é unha maneira para poder visibilizar o problema dos abusos na infancia. 

Descubrimos tamén o novo libro de poesía que vén de publicar o noso compañeiro Diego Cousillas. O seu título é G, e o propio autor deunos unha pincelada do que é a poesía experimental e explicou certos elementos que aparecen no seu libro, como é a Greguería, o haiku, o caligrama, ou a poesía tipográfica, entre outros.

Ademais de falar de lecturas, tamén avanzamos algunhas ideas e proxectos que temos en mente para a conmemoración do Día das Letras Galegas 2025, xa que o alumnado do Club de Lectura Larpacontos ESO ten moitísimo potencial creativo e artístico e sempre é voluntarioso á hora en participar en diferentes iniciativas. 

Antes de rematar a reunión utilizamos uns minutiños para falar do cartel do Día do Comic (17 de marzo 2025), creado por Bea Lema, a autora de Cuerpo de Cristo, Premio Nacional do Cómic 2024, no que volve a apostar pola súa característica técnica del bordado.

SÉTIMA REUNIÓN CLUB LECTURA LARPACONTOS ESO 24-25

O mércores 5 febreiro 2025 reunímonos na biblioteca o alumnado e profesorado participante no Clube de Lecturas Larpacontos ESO. Entre diferentes temas abordados na reunión, entre os que cabe destacar a promoción de diferentes concursos literarios, tratando de animar ao noso alumnado a explorar as súas dotes creativas e experimentar coa escritura, tamén estivemos analizando as lecturas recomendades entre as preferencias lectoras deste mes. Gran parte do tempo ocupounos falar do libro A historia de Sara, de Francisco Castro, unha lectura xa realizada en anos anteriores e coñecida por algúns membros/as do clube de lectura, a cal decidimos entre todos retomar de novo, sabendo da complexidade do tema que aborda e as problemáticas de abusos na infancia e adolescencia.

SEXTA REUNIÓN CLUB LECTURA LARPACONTOS

O mércores 15 xaneiro 2025 realizamos unha nova reunión, tras varias semanas de vacacións de nadal. Os rapaces do clube, expertos en manga e en videoxogos, falaron da nova saga Sword Art Online (Reki Kawahara, Planeta Cómic), unha serie de anime que narra a historia dun videoxogo de realidade virtual (VRMMORPG) chamado Sword Art Online, onde os xogadores quedan atrapados e non poden saír ata que superen o xogo. Queda anotado para as nosas próximas adquisicións. A mediadora informou aos membros do clube da imposibilidade de mercar La tumba de las luciérnagas (Akiyuki Nosaka, Editorial Acantiladl), un dos libros elixidos na votación de preferencias lectoras, xa que está descatalogado e non se atopa nas librarías. 

Parte da reunión empregouse para comentar as dúas últimas lecturas, Cuerpo de Cristo (Bea Lema, Astiberri Ediciones) y Soy de Pueblo. Manual para sobrevivir en la ciudad (Moderna de Puelbo, Editorial Lúmen). Ambos libros tiveron moi boa acollida entre os/as lectores/as, a pesares de que o primeiro é unha obra que aborda un tema moi serio (a saúde mental) e o segundo é un manual desenfadado escrito en clave de humor. 

Houbo tempo para promover diferentes concursos e premios literarios, como premios literarios Minerva (Colexio Peleteiro), XXI Premio “El Brocense” de microrrelatos (Diputación Provincial de Cáceres), animando á rapazada na práctica da escritura. Tamén se presentaron dous proxectos que se van desenvolver no noso centro (Falamos+ e Rede Compás), motivando ao alumnado do clube de lectura a participar activamente neles, tendo en conta o seu enorme potencial e a súa capacidade de traballo en equipo e cohexión. 

Para finalizar a reunión varios alumnos/as comentaron que varios libros da biblioteca non teñen a etiqueta axeitada, e que polos contidos abordados non son axeitados para a lectura de nenos/as de primaria. Transmitirase esta información á coordinadora da biblioteca escolar.